საქართველოს სტატისტიკის ეროვნულმა სამსახურმა გაეროს მოსახლეობის ფონდთან (UNFPA) თანამშრომლობით მოსახლეობის რეგისტრის შექმნის საგზაო რუკის პრეზენტაცია გამართა.
საგზაო რუკის მომზადების პროცესში საქსტატმა და UNFPA-მ ერთობლივად იმუშავეს, მათ შორის UNFPA-ს მიერ მოწვეული საერთაშორისო ექსპერტის აქტიური ჩართულობით. სამუშაო პროცესის ფარგლებში განხორციელდა ადმინისტრაციულ მონაცემთა ბაზების ანალიზი, შეფასდა მონაცემთა ხარისხი, ურთიერთთავსებადობა და ინტეგრაციის შესაძლებლობები მოსახლეობის რეგისტრის შექმნის კონტექსტში.
მოსახლეობის რეგისტრი წარმოადგენს თანამედროვე სტატისტიკური სისტემის მნიშვნელოვან ინფრასტრუქტურულ კომპონენტს და ქმნის საფუძველს სანდო, რეგულარულად განახლებადი დემოგრაფიული მონაცემების წარმოებისთვის, ამცირებს ტრადიციული აღწერების დანახარჯებს და ზრდის მონაცემებზე დაფუძნებული პოლიტიკის დაგეგმვის ეფექტიანობას.
პრეზენტაციას ესწრებოდნენ მოსახლეობის რეგისტრის დანერგვის საკითხებზე მომუშავე უწყებათაშორისი სამუშაო ჯგუფის წევრები, რომლებმაც განიხილეს საგზაო რუკის ძირითადი მიმართულებები და მოსახლეობის რეგისტრის ეტაპობრივი დანერგვის შემდგომი ნაბიჯები.
წარმოდგენილი საგზაო რუკა ქმნის საფუძველს საქართველოში რეგისტრებზე დაფუძნებული მოსახლეობის აღწერის დანერგვისთვის.