აუდიტის ხარისხის ამაღლების მიზნით, ბუღალტრული აღრიცხვის, ანგარიშგებისა და აუდიტის ზედამხედველობის სამსახური (SARAS) ყოველწლიურად მართავს შეხვედრებს აუდიტის პროფესიის წარმომადგენლებთან. სამსახურის ინიციატივით, დამატებით გაიმართა ინდივიდუალური სამუშაო შეხვედრები იმ აუდიტორული ფირმების ხელმძღვანელობასთან და ხარისხზე პასუხისმგებელ პირებთან, რომლებიც საზოგადოებრივი დაინტერესების პირების (სდპ-ის) ფინანსური ანგარიშგების აუდიტის უფლებამოსილებას ფლობენ.
შეხვედრების პირველ ნაწილში SARAS-მა თითოეული ფირმისგან ინდივიდუალურად მიიღო ინფორმაცია უკვე ძალაში შესული ხარისხის მართვის ახალი სტანდარტების – ISQM 1-ისა და ISQM 2-ის – ფირმაში დანერგვისა და პრაქტიკაში ფუნქციონირების შესახებ. შეხვედრების მეორე ნაწილში სამსახურის წარმომადგენლებმა ყურადღება გაამახვილეს სდპ უფლებამოსილების მქონე ფირმების მიმართ მონიტორინგის წესით დადგენილი მოთხოვნების გარკვეულ ნაწილზე და დეტალურად განმარტეს სამსახურის მხრიდან არსებული შესაბამისი მოლოდინები, რათა მოთხოვნების სწორად გააზრება და ერთგვაროვანი პრაქტიკა კიდევ უფრო გამყარდეს. სდპ უფლებამოსილების მქონე აუდიტორულ ფირმებთან ინდივიდუალური სამუშაო შეხვედრების ფორმატი საუკეთესო საერთაშორისო პრაქტიკის გათვალისწინებით შეირჩა. სამსახური გეგმავს ამ ფორმატის შეხვედრების სისტემატურ გაგრძელებას მომდევნო პერიოდშიც.
აღსანიშნავია, რომ უფლებამოსილების მინიჭების ახალ ეტაპზე გადასვლისას (2024 წელი) აუდიტორული ფირმებისა და აუდიტორების მიმართ, მათ შორის სდპ უფლებამოსილების მქონე პირების მიმართ, დაწესდა ახალი მოთხოვნები. შესაბამისად, სამსახურის მიერ პროფესიასთან გამართულ თითოეულ შეხვედრაზე განსაკუთრებული ყურადღება ეთმობა საკანონმდებლო ცვლილებებს, რათა ფირმებმა/აუდიტორებმა საკუთარი გარემოებების გათვალისწინებით დროულად შეაფასონ მოთხოვნები და იმოქმედონ პროაქტიულად კანონის მოთხოვნებთან შესაბამისობის მისაღწევად.
SARAS-ის შეფასებით, აღნიშნული მიდგომა მნიშვნელოვნად უწყობს ხელს როგორც ხარისხის მართვის სტანდარტების (ISQM 1 და ISQM 2) დანერგვის პროცესის მხარდაჭერას, ისე მონიტორინგის წესით განსაზღვრული მოთხოვნების ერთგვაროვანი გაგებისა და პრაქტიკაში სწორად დანერგვის უზრუნველყოფას.
2024 წელს ამოქმედებული ცვლილებების შესახებ დეტალური ინფორმაცია ხელმისაწვდომია ბმულზე.