ბუღალტრული აღრიცხვის, ანგარიშგებისა და აუდიტის ზედამხედველობის სამსახურის უფლებამოსილების ფარგლებს განეკუთვნება, მათ შორის, პირის სერტიფიცირებულ ბუღალტრად აღიარებისათვის და მის მიერ კვალიფიკაციის შენარჩუნებისათვის პროფესიული სერტიფიცირების სტანდარტისა და განგრძობითი განათლების სტანდარტის დადგენა, რომლებიც შეესაბამება European Union-ის შესაბამისი დირექტივების მოთხოვნებს და International Federation of Accountants (IFAC)-ის მიერ დადგენილ განათლების საერთაშორისო სტანდარტებს (IES).
აღნიშნულის გათვალისწინებით, სამსახურის მიერ შემუშავდა კანონქვემდებარე აქტის პროექტი, რომელიც ითვალისწინებს სამსახურის უფროსის 2017 წლის 25 სექტემბრის №ნ-16 ბრძანებაში („პროფესიული სერტიფიცირების სტანდარტისა და სასერტიფიკაციო პროგრამებისა და საგამოცდო პროცესის აღიარების წესის დამტკიცების შესახებ“) ცვლილების შეტანას.
პროექტში ასახულია ცვლილებები, რომლებიც მიზნად ისახავს პრაქტიკაში გამოვლენილი ხარვეზების აღმოფხვრას, პროცედურების უფრო მკაფიოდ განსაზღვრას და განათლების საერთაშორისო სტანდარტებთან (IES) შესაბამისობის უზრუნველყოფას.
სამსახური კანონქვემდებარე აქტის პროექტს საჯაროდ აქვეყნებს იმ პროფესიული წრისგან უკუკავშირის მიღების მიზნით, ვისზეც რეგულაცია პირდაპირ აისახება და ვისი ჩართულობაც დოკუმენტის დახვეწის პროცესში მნიშვნელოვანია. კერძოდ, სამსახური უკუკავშირს ელის აუდიტორებისგან, აუდიტორული ფირმებისგან, პროფესიული ორგანიზაციებისგან (PAO-ები), სასერტიფიკაციო პროგრამების ან/და საგამოცდო პროცესის, საგანმანათლებლო საქმიანობის განმახორციელებელი პირებისგან, საგამოცდო პროცესში ჩართული/დაინტერესებული სუბიექტებისგან, ასევე სერტიფიცირებული ბუღალტრებისა და სერტიფიცირებაზე ორიენტირებული კანდიდატებისგან.
დაინტერესებულ პირებს კომენტარების/რეკომენდაციების წარმოდგენა შეუძლიათ სიახლის გამოქვეყნებიდან 10 სამუშაო დღის განმავლობაში (მიმდინარე წლის 26 თებერვლის ჩათვლით).
კომენტარების/რეკომენდაციების მოწოდება შესაძლებელია როგორც ელექტრონულად, სამსახურისთვის ელ. წერილის გაგზავნის ფუნქციონალის მეშვეობით (https://saras.gov.ge/ms/), ისე მატერიალურად, მისამართზე: ქ. თბილისი, ილია ჭავჭავაძის გამზირი N17ე, X სართული.
საჭიროების შემთხვევაში, სამსახური გამოხატავს მზაობას, გამართოს სამუშაო შეხვედრა დაინტერესებულ მხარეებთან.
უკუკავშირის მიზანია, წარმოდგენილი პროექტის ირგვლივ მიღებული შენიშვნებისა და რეკომენდაციების გათვალისწინებით, საბოლოო დოკუმენტის დახვეწა და მისი პრაქტიკაში გამოყენების გამარტივება.
იხილეთ, ნორმატიული აქტის პროექტი.