ბუღალტერთა კავშირის ორგანიზებითა და საქართველოს ეროვნული ბანკის თანაორგანიზებით, საქართველოს ეროვნული უნივერსიტეტის (SEU) საკონფერენციო დარბაზში გაიმართა საერთაშორისო კონფერენცია „ფინანსური ნდობის ეკოსისტემა 2026“. ღონისძიება მიზნად ისახავდა ფინანსური ანგარიშგების ხარისხის ამაღლების, ტექნოლოგიური ტრანსფორმაციის, პროფესიული ეთიკისა და ინსტიტუციური დიალოგის გაძლიერებას.
კონფერენციის ოფიციალურ გახსნაზე მისასალმებელი სიტყვით გამოვიდნენ საქართველოს ეროვნული ბანკის პრეზიდენტი ნათია თურნავა, აზერბაიჯანის ეკონომისტთა კავშირის პრეზიდენტი ზიად სამედზადე და საქართველოს პარლამენტის საფინანსო-საბიუჯეტო კომიტეტის თავმჯდომარის მოადგილე ბეჟან წაქაძე.
ნათია თურნავამ გამოსვლაში განსაკუთრებული აქცენტი გააკეთა ფინანსური ნდობის, ხარისხიანი ანგარიშგებისა და ინსტიტუციური თანამშრომლობის მნიშვნელობაზე. მისასალმებელ სიტყვაში განსაკუთრებულად აღინიშნა ბუღალტრული აღრიცხვის, ანგარიშგებისა და აუდიტის ზედამხედველობის სამსახურის (SARAS) როლი ფინანსური ანგარიშგების სისტემის განვითარებაში, ვინაიდან SARAS-ი წარმოადგენს ფინანსური გამჭვირვალობის, ანგარიშვალდებულებისა და პროფესიული სტანდარტების დაცვის ერთ-ერთ მთავარ ინსტიტუციურ საყრდენს ქვეყანაში. ასევე აღინიშნა ეროვნული ბანკისა და SARAS-ის თანამშრომლობა, როგორც ფინანსური სტაბილურობისა და სანდოობის ეკოსისტემის განმტკიცების მნიშვნელოვანი წინაპირობა.
კონფერენციის ფარგლებში გაიმართა პანელური დისკუსია თემაზე – „ფინანსური სტრატეგია, ინსტიტუციური ნდობა და რეგულაცია“, რომელშიც მონაწილეობდა SARAS-ის უფროსი დავით მჭედლიძე. თავის გამოსვლაში მან ყურადღება გაამახვილა ფინანსური ანგარიშგების ხარისხის უზრუნველყოფის მექანიზმებზე, ზედამხედველობის პრაქტიკაზე და რეგულაციის როლზე ინსტიტუციური ნდობის ფორმირებაში. ასევე აღნიშნა, რომ ეფექტიანი ზედამხედველობა, საერთაშორისო სტანდარტებთან შესაბამისობა და ციფრული პროცესების განვითარება წარმოადგენს ფინანსური ეკოსისტემის მდგრადობის საფუძველს. გარდა ამისა, ხაზი გაესვა ანგარიშგების კულტურის გაძლიერების მნიშვნელობასა და პროფესიული საზოგადოების ჩართულობის როლს.