საკანონმდებლო მაცნეში გამოქვეყნდა და ამოქმედდა სამსახურის უფროსის ბრძანება „ანგარიშგების ვებგვერდზე გამოქვეყნებული ანგარიშგებების საერთაშორისო სტანდარტებთან შესაბამისობის მიმოხილვის წესის შესახებ“.
ბრძანებით განისაზღვრა ანგარიშგების ვებგვერდზე გამოქვეყნებული ფინანსური ანგარიშგებების საერთაშორისო სტანდარტებთან შესაბამისობის მიმოხილვის განხორციელების წესი. ნორმატიული აქტი ადგენს შესაბამისობის შეფასების სამართლებრივ და პროცედურულ ჩარჩოს, უზრუნველყოფს მიმოხილვის პროცესის გამჭვირვალობასა და ერთიან მიდგომას და ხელს უწყობს ფინანსური ანგარიშგების ხარისხის გაუმჯობესებას.
მიმოხილვას ექვემდებარება ადმინისტრაციული წარმოების დაწყებამდე წარდგენილი და ანგარიშგების ვებგვერდზე გამოქვეყნებული, უახლესი საანგარიშგებო პერიოდის ფინანსური ანგარიშგება. საერთაშორისო სტანდარტებთან შეუსაბამობის გამოვლენის შემთხვევაში, სამსახური იმოქმედებს მოქმედი კანონმდებლობით განსაზღვრული წესის შესაბამისად.
ბრძანების მიზანია ფინანსური ანგარიშგების საერთაშორისო სტანდარტებთან შესაბამისობის შეფასების სამართლებრივი პროცედურის დადგენა, ანგარიშგების ხარისხის ზრდა და საერთაშორისო სტანდარტებთან შესაბამისობის ამაღლების ხელშეწყობა, რაც, თავის მხრივ, ემსახურება სამართალდარღვევათა პრევენციასა და ანგარიშგების სისტემის სანდოობის განმტკიცებას.
ნორმატიული აქტის პროექტი საჯაროდ გამოქვეყნდა უკუკავშირის მიღების მიზნით. მისი შემუშავების პროცესში გათვალისწინებული იქნა ბუღალტრული აღრიცხვის, ანგარიშგებისა და აუდიტის საბჭოს, პროფესიული წრეებისა და სხვა დაინტერესებული მხარეების მოსაზრებები. მიღებული კომენტარებისა და შენიშვნების ანალიზის საფუძველზე, პროექტი გადამუშავდა, რაც უზრუნველყოფს რეგულირების პრაქტიკულ საჭიროებებთან შესაბამისობას და პროფესიული საზოგადოების ჩართულობას.
ბრძანება მნიშვნელოვანია იმ საწარმოებისთვის, რომლებიც საერთაშორისო სტანდარტების (ფინანსური ანგარიშგების საერთაშორისო სტანდარტების (IFRS) და მცირე და საშუალო საწარმოებისთვის დადგენილი ფინანსური ანგარიშგების საერთაშორისო სტანდარტის (IFRS for SMEs)) შესაბამისად ამზადებენ ანგარიშგებას.
ნორმატიული აქტი ადგენს ანგარიშგების ვებგვერდზე გამოქვეყნებული ფინანსური ანგარიშგებების შეფასების სამართლებრივ საფუძველს და განმარტავს მიმოხილვის პროცესთან დაკავშირებულ პროცედურებს.