საქსტატის აღმასრულებელი დირექტორი გოგიტა თოდრაძე გაეროს სტატისტიკის კომისიის 57-ე სესიაში იღებს მონაწილეობას, რომელიც მიმდინარე წლის 3-6 მარტს ქ. ნიუ-იორკში, გაეროს შტაბბინაში იმართება.
გაეროს სტატისტიკის კომისია წარმოადგენს ოფიციალური სტატისტიკის სფეროში უმაღლესი დონის სამთავრობათაშორისო ფორმატს, რომელიც განსაზღვრავს გლობალურ სტანდარტებსა და მეთოდოლოგიურ ჩარჩოებს. სესიაში მონაწილეობენ გაეროს წევრი ქვეყნების სტატისტიკის ეროვნული სამსახურების ხელმძღვანელები და საერთაშორისო ორგანიზაციების წარმომადგენლები.
სესიის ფარგლებში გოგიტა თოდრაძე სიტყვით გამოდის კომისიის პლენარულ სხდომებზე, მონაწილეობს თემატურ განხილვებში და საუბრობს ისეთ საკითხებზე, როგორიცაა სოციალური და დემოგრაფიული სტატისტიკა, ეროვნული ანგარიშები, გარემოსა და კლიმატის ცვლილების სტატისტიკა, სოფლის მეურნეობის სტატისტიკა, ბიზნესისა და ვაჭრობის სტატისტიკა, მდგრადი განვითარების მიზნების ინდიკატორები და 2030 წლის დღის წესრიგის მონიტორინგი, სტატისტიკური მონაცემებისა და მეტამონაცემების გავრცელება, სტატისტიკის სამსახურის შესაძლებლობების გაძლიერება, რეგიონული სტატისტიკური თანამშრომლობის განვითარება, სტატისტიკისა და გეოსივრცითი ინფორმაციის ინტეგრაცია, აგრეთვე მონაცემთა მეცნიერებისა და ალტერნატიული მონაცემების გამოყენება ოფიციალურ სტატისტიკაში.
საქსტატის აღმასრულებელი დირექტორი თავის გამოსვლებში ყურადღებას გაახვილებს საქართველოს სტატისტიკის სისტემაში მიმდინარე ინსტიტუციურ და მეთოდოლოგიურ განვითარებაზე, საერთაშორისო სტანდარტებთან ჰარმონიზაციაზე, მონაცემთა ხარისხის გაუმჯობესებასა და მომხმარებელზე ორიენტირებული სტატისტიკური პროდუქტების განვითარებაზე. ასევე თანამედროვე ტექნოლოგიების დანერგვისა და ადმინისტრაციული მონაცემების ეფექტიანი გამოყენების მნიშვნელობაზე.
ვიზიტის ფარგლებში დაგეგმილია ორმხრივი შეხვედრები სხვადასხვა საერთაშორისო ორგანიზაციისა და პარტნიორი ქვეყნების სტატისტიკის სამსახურების ხელმძღვანელებთან, სადაც განხილული იქნება მიმდინარე და სამომავლო თანამშრომლობის საკითხები.
საქართველოს აქტიური მონაწილეობა გაეროს სტატისტიკის კომისიის 57-ე სესიაში უნიკალური შესაძლებლობაა ქვეყნის სტატისტიკური სისტემის საერთაშორისო ინტეგრაციის გასაღრმავებლად და გლობალურ სტატისტიკურ პროცესებში მისი გავლენის გასაძლიერებლად.