ბუღალტრული აღრიცხვის, ანგარიშგებისა და აუდიტის ზედამხედველობის სამსახურმა (SARAS) AML/CFT მიმართულებით მოამზადა „კლიენტის მფლობელობისა და კონტროლის (მმართველობის) სტრუქტურის შესწავლის და ბენეფიციარი მესაკუთრის იდენტიფიკაციისა და ვერიფიკაციის გზამკვლევი“.
გზამკვლევის მიზანია, „ფულის გათეთრებისა და ტერორიზმის დაფინანსების აღკვეთის ხელშეწყობის შესახებ“ საქართველოს კანონის მიზნებისთვის, სამსახურის წინაშე ანგარიშვალდებულ პირებს მიაწოდოს პრაქტიკული და სისტემატიზებული ინფორმაცია ბენეფიციარი მესაკუთრის იდენტიფიკაციისა და ვერიფიკაციის პროცესთან დაკავშირებულ ძირითად საკითხებზე. კლიენტის მფლობელობისა და კონტროლის (მმართველობის) სტრუქტურის შესწავლა და ბენეფიციარი მესაკუთრის იდენტიფიკაცია და ვერიფიკაცია წარმოადგენს ერთ-ერთ ძირეულ AML/CFT მოთხოვნას.
მისი მიზანია გამოავლინოს პირი, რომელიც რეალურად აკონტროლებს კომპანიას და იღებს ეკონომიკურ სარგებელს, მიუხედავად ფორმალური რეგისტრაციისა. ბენეფიციარი მესაკუთრის იდენტიფიკაცია/ვერიფიკაცია ემსახურება ფინანსური სისტემის სანდოობის გაზრდასა და საერთაშორისო სტანდარტებთან შესაბამისობას.
გზამკვლევი სარეკომენდაციო ხასიათის დოკუმენტია და გამოყენებულ უნდა იქნეს სამსახურის უფროსის 2023 წლის 7 ნოემბრის N14 ბრძანებით დამტკიცებულ „ანგარიშვალდებული პირის მიერ კლიენტის მფლობელობისა და კონტროლის (მმართველობის) სტრუქტურის შესწავლის და ბენეფიციარი მესაკუთრის იდენტიფიკაციისა და ვერიფიკაციის წესთან“ ერთად.
გზამკვლევის მომზადება და გამოქვეყნება ემსახურება ანგარიშვალდებული პირებისთვის კანონმდებლობით განსაზღვრული მოთხოვნების უკეთ აღქმას, ერთგვაროვანი პრაქტიკის ხელშეწყობას და შესაბამისობის ხარისხის გაუმჯობესებას. დოკუმენტი სამსახურის წინაშე ანგარიშვალდებულ პირებს აძლევს შესაძლებლობას, ერთ სივრცეში მიიღონ იმ ძირითადი საკითხების შესახებ პრაქტიკული ინფორმაცია, რომელიც ბენეფიციარი მესაკუთრის იდენტიფიკაციისა და ვერიფიკაციის პროცესისთვის მნიშვნელოვანია.