ფინანსთა სამინისტროს შემოსავლების სამსახურმა საგადასახადო ადმინისტრაციების შიდა-ევროპული ორგანიზაციის (IOTA) ფორუმს უმასპინძლა, რომლის მთავარი თემა იყო – „დღგ-ს თაღლითობის წინააღმდეგ ბრძოლა ექსპორტ-იმპორტის დროს“.
ღონისძიება გახსნეს და ფორუმის მონაწილეებს მისასალმებელი სიტყვით მიმართეს შემოსავლების სამსახურის საერთაშორისო ურთიერთობათა დეპარტამენტის უფროსის მოადგილემ, დაჩი ქინქლაძემ და IOTA-ს სამდივნოს წარმომადგენელმა, მასიმო მორარელიმ. დაჩი ქინქლაძემ ხაზი გაუსვა საგადასახადო ადმინისტრაციების შიდა-ევროპული ორგანიზაციის ფორუმის მნიშვნელობას და მონაწილეებს წარმატებული საქმიანობა უსურვა.
აღნიშნულ ფორუმს 17 წევრი ქვეყნის საგადასახადო ადმინისტრაციის 31 მონაწილე დაესწრო. სამუშაო შეხვედრების მსვლელობისას, დელეგატებს შორის განხილული იქნა ისეთი თემები, როგორიცაა – გლობალური საგადასახადო ინიციატივების ფარგლებში, დღგ-ის თაღლითობის წინააღმდეგ ბრძოლა, ასევე საგადასახადო ადმინისტრაციებს შორის თანამშრომლობა, წარმატებული გამოცდილების გაზიარება და ევროპის რეგიონის საგადასახადო ადმინისტრაციების წინაშე არსებული მნიშვნელოვანი გამოწვევების განხილვა.
IOTA წარმოადგენს ევროპული რეგიონის საგადასახადო ადმინისტრაციების ორგანიზაციას, რომელიც 1996 წელს დაარსდა და ამჟამად 43 ქვეყნის ადმინისტრაციას აერთიანებს. საქართველოს შემოსავლების სამსახური ორგანიზაციის წევრი 2004 წლიდან არის, ხოლო 2022-2023 წლებში ის IOTA-ს პრეზიდენტ ქვეყანად იქნა დასახელებული.