საქართველოს სტატისტიკის ეროვნული სამსახურის (საქსტატი) აღმასრულებელმა დირექტორმა, გოგიტა თოდრაძემ, მონაწილეობა მიიღო ოფიციალური სტატისტიკის საერთაშორისო ასოციაციის (IAOS) მიერ ორგანიზებულ მე-20 საერთაშორისო კონფერენციაში – „მონაცემთა რევოლუციის ნავიგაცია: ინოვაციები და გავლენა თანამედროვე სტატისტიკაში“, რომელიც 12-14 მაისს, ქალაქ ვილნიუსი გაიმართა.
IAOS-ის კონფერენცია ოფიციალური სტატისტიკის სფეროში ერთ-ერთ ყველაზე მაღალი დონის საერთაშორისო პლატფორმას წარმოადგენს და აერთიანებს სტატისტიკის ეროვნული სამსახურების წარმომადგენლებს, აკადემიურ და სამეცნიერო წრეებს, ასევე საერთაშორისო ორგანიზაციების წამყვან ექსპერტებს. წლევანდელ ღონისძიებას ესწრებოდნენ მსოფლიოს სხვადასხვა ქვეყნის მთავარი სტატისტიკოსები, გენერალური დირექტორები და დარგის წამყვანი ექსპერტები.
კონფერენციის ფარგლებში გოგიტა თოდრაძემ რამდენიმე თემატური პრეზენტაცია წარადგინა, მათ შორის — „ინფორმაციის ახალი წყაროები და ინსტრუმენტები: ხელოვნური ინტელექტი და მანქანური სწავლება ოფიციალურ სტატისტიკაში“. პრეზენტაციაში წარმოდგენილი იყო, თუ როგორ იყენებს საქსტატი ხელოვნურ ინტელექტს სტატისტიკური წარმოების მოდერნიზაციისთვის, მონაცემთა ხარისხის გაუმჯობესებისა და ინოვაციური მიდგომების დანერგვის მიზნით.
მოხსენებაში განსაკუთრებული ყურადღება დაეთმო საქართველოს გამოცდილებას ციფრული ტრანსფორმაციის მიმართულებით, რაც ადასტურებს, რომ ეფექტიანი და ინოვაციური ცვლილებების განხორციელება შესაძლებელია რესურსების შეზღუდული პირობების მიუხედავადაც.
IAOS-ის კონფერენცია მონაწილეებს შესაძლებლობას აძლევს, გააძლიერონ საერთაშორისო პროფესიული თანამშრომლობა და დაამყარონ ახალი პარტნიორული კავშირები ოფიციალური სტატისტიკის სფეროში.