საქართველოს სტატისტიკის ეროვნულმა სამსახურმა ახალი ინტერაქტიული პორტალი წარადგინა, რომელიც ერთ სივრცეში აერთიანებს საქართველოში ფასებთან დაკავშირებულ სტატისტიკურ მონაცემებს და მათ ფართო საზოგადოებისთვის კიდევ უფრო ხელმისაწვდომს ხდის.
პორტალზე არსებული მონაცემთა ვიზუალიზაციის ინტერაქტიული ინსტრუმენტების მეშვეობით მომხმარებელს შეუძლია, დამოუკიდებლად შეადგინოს სასურველი ანალიტიკური სურათი – გაფილტროს, შეადაროს და ჩამოტვირთოს მისთვის საჭირო მონაცემები პროფესიული თუ საყოფაცხოვრებო საჭიროებისამებრ. ახალი პლატფორმა შეიცავს ისეთ მოთხოვნად ინფორმაციას, როგორიცაა სასურსათო პროდუქტებზე საშუალო ფასები და მათი დინამიკა, უძრავი ქონების ფასების სტატისტიკა და სხვა.
პრეზენტაციას ესწრებოდნენ სამთავრობო უწყებებისა და სხვა დაინტერესებული მხარეების წარმომადგენლები. თავის სიტყვაში საქსტატის აღმასრულებელმა დირექტორმა, გოგიტა თოდრაძემ აღნიშნა, რომ პორტალი ფასების სფეროში გადაწყვეტილების მიღებისა და ეკონომიკური ანალიზის მნიშვნელოვანი ინსტრუმენტი გახდება – როგორც სახელმწიფო სტრუქტურებისთვის, ისე კვლევითი ორგანიზაციებისა და ფართო საზოგადოებისთვის.
პორტალი მოიცავს ექვს მიმართულებას. საშუალო ფასების მოდული ასახავს სამომხმარებლო საქონელსა და მომსახურებაზე ქვეყნის მასშტაბით რეგისტრირებულ ფასებს. ინფლაციის განყოფილება წარმოადგენს სამომხმარებლო ფასების ინდექსს და ფასების ცვლილების გრძელვადიან ტენდენციებს. სამომხმარებლო კალათის მოდული საშუალებას იძლევა, თვალი ვადევნოთ კალათის შემადგენლობასა და მოსახლეობის მოხმარების სტრუქტურის დროში ცვლილებას. მწარმოებელთა და იმპორტის ფასების სტატისტიკა ეხება როგორც ადგილობრივად წარმოებული, ისე იმპორტირებული სამრეწველო პროდუქციის ფასების დინამიკას. სოფლის მეურნეობის პროდუქციის ერთეულის ღირებულების ინდექსი ასახავს აგრარული სექტორის პროდუქციის ფასების დინამიკას. ბოლო მოდული — მშენებლობა და უძრავი ქონება – მოიცავს მშენებლობის ღირებულების ინდექსს და საცხოვრებელი უძრავი ქონების ფასების სტატისტიკურ მონაცემებს.
საქსტატის მიზანია, აწარმოოს და საზოგადოებას შესთავაზოს მაღალი ხარისხის მონაცემები თვალსაჩინო და მარტივად აღსაქმელი ფორმით, რაც აადვილებს მის გამოყენებას და აუმჯობესებს დაგეგმვისა და გადაწყვეტილების მიღების პროცესებს ნებისმიერ დონეზე.
ფასების სტატისტიკის პორტალი ხელმისაწვდომია ბმულზე: https://prices.geostat.ge/?lang=ka