2026 წლის 28-29 მაისს საქართველოს სტატისტიკის ეროვნულ სამსახურს სამუშაო ვიზიტით ევროსტატის ექსპერტი ეწვია. ვიზიტის მიზანია საქსტატის მიერ საერთაშორისო შედარებების პროგრამის (International Comparison Program — ICP) ფარგლებში განხორციელებული სამუშაოების შეფასება და ევროკავშირის მეთოდოლოგიასა და სტანდარტებთან მათი შესაბამისობის რეგულარული შემოწმება.
გასულ წლებში საქართველომ ICP-ის 2017 და 2021 წლების რაუნდებში მიიღო მონაწილეობა, ევროსტატი-OECD-ის სამუშაო ჯგუფში ჩართვის მეშვეობით. პროგრამის ფარგლებში საქსტატი უზრუნველყოფს ევროკავშირის მოთხოვნების შესაბამისად სხვადასხვა გამოკვლევის ჩატარებასა და მონაცემთა ბაზების მომზადებას. პროგრამის მთავარი მიზანია მონაწილე ქვეყნების მთლიანი შიდა პროდუქტის შედარება მსყიდველობითი უნარის პარიტეტის საფუძველზე.
2024 წლიდან საქსტატი ჩართულია აღნიშნული პროგრამის აქტივობებში GOPA-ის დაფინანსებით. GOPA წარმოადგენს ევროსტატის კონტრაქტორს და პასუხისმგებელია აღნიშნული აქტივობების კოორდინაციაზე საქართველოში, მოლდოვასა და უკრაინაში.
მიმდინარე ვიზიტის დღის წესრიგშია 2025-2026 წლებში შესასრულებელი სამუშაოები. ევროსტატის ექსპერტმა და საქსტატის ფასების სტატისტიკის დეპარტამენტის წარმომადგენლებმა შეაფასეს საქართველოს პროგრესი შედარებების პროგრამის რეგულარულ ციკლში სრულფასოვანი ინტეგრაციის მიზნით.
საერთაშორისო შედარებების პროგრამა მსოფლიო ბანკის ეგიდით ხორციელდება და მასში მსოფლიოს 200-მდე ქვეყანაა ჩართული. საქართველოს მონაწილეობა პროგრამაში განსაკუთრებულ მნიშვნელობას იძენს ევროკავშირის სტანდარტებთან ჰარმონიზაციის პროცესის კონტექსტში.