ბუღალტრული აღრიცხვის, ანგარიშგებისა და აუდიტის ზედამხედველობის სამსახურმა (SARAS) ონლაინ საინფორმაციო შეხვედრა გამართა, რომელიც ფინანსური ანგარიშგებების მიმოხილვის პროცესს, ფასს სტანდარტებთან მიმართებით ხშირად გამოვლენილ შეუსაბამობებსა და ანგარიშგებების მომზადებისას გასათვალისწინებელ პრაქტიკულ საკითხებს დაეთმო.
შეხვედრა განკუთვნილი იყო დაინტერესებული მხარეებისთვის, აუდიტორებისა და იმ საწარმოთა წარმომადგენლებისთვის, რომლებიც ფინანსურ ანგარიშგებებს ფასს სტანდარტების შესაბამისად ამზადებენ.
შეხვედრის ფარგლებში სამსახურის (SARAS) წარმომადგენლებმა მონაწილეებს გააცნეს ფინანსური ანგარიშგებების მიმოხილვის პროცესთან დაკავშირებული საკითხები, პრაქტიკაში ხშირად გამოვლენილი შეუსაბამობები და შესაბამისი რეკომენდაციები.
ყურადღება გამახვილდა თემატური მიმოხილვების ფარგლებში გამოვლენილ მიგნებებზე, ასევე არსებითობასა და მის როგორც რაოდენობრივ, ისე ხარისხობრივ ფაქტორებზე, რომელთა გათვალისწინებაც მნიშვნელოვანია ფინანსური ანგარიშგებების მომზადების პროცესში.
მონაწილეებს ასევე მიეწოდათ ინფორმაცია ახალი სტანდარტებისა და ფასს სტანდარტებში განხორციელებული ცვლილებებისა და შესწორებების შესახებ.
აღნიშნული შეხვედრა მიზნად ისახავდა ანგარიშვალდებული პირების ინფორმირებულობის გაზრდას, ფინანსური ანგარიშგებების ხარისხის გაუმჯობესების ხელშეწყობასა და ანგარიშგებების მომზადების პროცესში გასათვალისწინებელ საკითხებზე პრაქტიკული ინფორმაციის გაზიარებას.