ნოემბერში საპენსიო ფონდის პორტფელებმა მოკრძალებული ზრდის ტემპი დააფიქსირეს, რაც საერთაშორისო აქციების ბაზრებზე ზრდის შენელებას უკავშირდებოდა, რასაც თავის მხრივ განაპირობებდა სტატისტიკური მონაცემების გამოქვეყნების ირგვლივ არსებული გაურკვევლობა და მონეტარული პოლიტიკის პერსპექტივებთან დაკავშირებული განსხვავებული მოლოდინები.
ნოემბერში ყველაზე მაღალი, 0.58%-იანი ზრდა კონსერვატიულმა პორტფელმა დააფიქსირა, ხოლო დაბალანსებული და დინამიკური პორტფელების მომგებიანობამ შესაბამისად 0.39% და 0.20% შეადგინა.
შედარებით დაბალი თვიური ზრდის მიხედავად, დინამიკური პორტფელი წლის დასაწყისიდან დღემდე შემოსავლიანობის კუთხით ლიდერობას ინარჩუნებს:
🔹 დინამიკური – 14.13%
🔹 დაბალანსებული – 12.26%
🔹 კონსერვატიული – 10.76%
აღსანიშნავია, რომ დინამიკური პორტფელი შექმნის დღიდან (2023 წლის 6 აგვისტო) გაწლიურებული შემოსავლის მიხედვითაც ლიდერობს და მისი შემოსავლიანობა 14.3%-ს უტოლდება, ხოლო დაბალანსებული და კონსერვატიული პორტფელებისათვის შესაბამისი მაჩვენებლები 13.1% და 11.8%-ს შეადგენს.
საქართველოს საპენსიო ფონდის აქტივებმა ნოემბრის ბოლოსთვის 8.0 მილიარდ ლარს გადააჭარბა, ხოლო დაგენერირებულმა ამონაგებმა – 2.2 მილიარდ ლარს მიაღწია.
ფონდის აქტივების, საინვესტიციო პორტფელების განაწილებისა და შედეგების დეტალური მიმოხილვისთვის, გთხოვთ ეწვიოთ ჩვენს ინტერაქტიულ ანგარიშებს, ვრცლად ანგარიშები შეგიძლიათ იხილოთ ბმულზე.
