ფინანსთა სამინისტროს შემოსავლების სამსახურის საბაჟო დეპარტამენტის წარმომადგენლებმა თურქეთის რესპუბლიკის ვაჭრობის სამინისტროს დელეგაციის წევრებს უმასპინძლეს. ვიზიტის მიზანია საქართველოში ავტორიზებული ეკონომიკური ოპერატორის (AEO) სტატუსის მქონე კომპანიების შესაძლებლობების შეფასება და პროექტის განხორციელების პროცესში მიღებული შედეგების გაცნობა.
აღსანიშნავია, რომ საქართველოსა და ევროკავშირს შორის გაფორმებული ასოცირების შესახებ შეთანხმებით, საქართველომ აიღო სამართლებრივი ვალდებულება, ეტაპობრივად მოახდინოს საბაჟო პროცედურების ევროპულ რეგულაციებთან დაახლოება. ამასთან, აღნიშნული რეგულაციები ავტორიზებული ეკონომიკური ოპერატორის კონცეფციის იმპლემენტაციასაც გულისხმობს და ის საბაჟო სისტემასა და ბიზნესს შორის პარტნიორულ ურთიერთობას ეფუძნება. ახალი სტატუსი კომპანიებს ახალ გამარტივებულ საბაჟო შესაძლებლობებს სთავაზობს, კერძოდ – ავტორიზაციის მფლობელის კუთვნილი/მფლობელობაში არსებული საქონლის მიმართ საბაჟო ფორმალობების განხორციელებისას შემცირებულია საქონლის ფიზიკური დათვალიერებისა და დოკუმენტური შემოწმების სიხშირე, ხოლო საბაჟო გაფორმების პროცედურები პრიორიტეტული წესით სრულდება.
სამუშაო შეხვედრების ფარგლებში, მხარეებმა განიხილეს ავტორიზებული ეკონომიკური ოპერატორის პროგრამის პრაქტიკული ასპექტები, გამოცდილების გაზიარების შესაძლებლობები და საბაჟო ადმინისტრაციებს შორის თანამშრომლობის შემდგომი გაღრმავების პერსპექტივები.
შეგახსენებთ, რომ საქართველოში ავტორიზებული ეკონომიკური ოპერატორის (AEO) სტატუსს უკვე 30 კომპანია ფლობს.