ფინანსთა სამინისტროს შემოსავლების სამსახურის საბაჟო დეპარტამენტის ხელმძღვანელმა, სოსო ობოლაძემ და საერთაშორისო ურთიერთობათა დეპარტამენტის უფროსის მოადგილემ, მინდია გრძელიძემ მონაწილეობა მიიღეს ქ. ბრიუსელში გამართულ მსოფლიო საბაჟო ორგანიზაციის (WCO) საბჭოს 147/148 სესიებში, რომლებსაც 187 წევრი ქვეყნის საბაჟო ადმინისტრაციის ხელმძღვანელი პირი დაესწრო.
საბჭოს სესიის ფარგლებში, მონაწილეებმა მოისმინეს მსოფლიო საბაჟო ორგანიზაციის გენერალური მდივნისა და სხვადასხვა დირექტორატის წევრების ანგარიშები – რეგიონული თანამშრომლობის, საბაჟო ადმინისტრაციების წინაშე არსებული გამოწვევებისა და სამომავლო გეგმების შესახებ. ამასთან, შემოსავლების სამსახურის დელეგაციის ხელმძღვანელმა სოსო ობოლაძემ, ელექტრონული კენჭისყრის რეჟიმში, მონაწილეობა მიიღო საბჭოს ვიცე-პრეზიდენტისა და სხვადასხვა კომიტეტების თავმჯდომარის არჩევნების პროცესში.
აღნიშნული სესიების მიმდინარეობისას, უწყების წარმომადგენლებმა გაცნობითი ხასიათის ორმხრივი შეხვედრები გამართეს ბულგარეთის, თურქეთის, აზერბაიჯანის, უზბეკეთის, ყაზახეთის და ყირგიზეთის საბაჟო ადმინისტრაციის ხელმძღვანელებთან, სადაც მონაწილე მხარეებმა ორმხრივი თანამშრომლობის, ინსტიტუციური რეფორმებისა და საბაჟო ადმინისტრაციების სამომავლო გეგმების საკითხები განიხილეს.
ფინანსთა სამინისტროს შემოსავლების სამსახური მომავალშიც აქტიურად გააგრძელებს თანამშრომლობას მსოფლიო საბაჟო ორგანიზაციის სხვადასხვა პლატფორმაზე, როგორც ოპერატიული კონსულტაციის, ასევე რეგიონული პარტნიორობის ხელშეწყობის მიმართულებით.