საქართველოს სტატისტიკის ეროვნულმა სამსახურმა ხელოვნურ ინტელექტზე (AI) დაფუძნებული NACE კლასიფიკატორის ახალი საძიებო პორტალის პრეზენტაცია გამართა.
ღონისძიებას ესწრებოდნენ სახელმწიფო უწყებების, ბიზნესსექტორის, საერთაშორისო და დონორი ორგანიზაციების, ასევე აკადემიური წრეების წარმომადგენლები.
ახალი პორტალი დამსწრე საზოგადოებას საქსტატის აღმასრულებელმა დირექტორმა გოგიტა თოდრაძემ წარუდგინა. პრეზენტაციის ფარგლებში მან ისაუბრა ოფიციალური სტატისტიკის სისტემაში ინოვაციური ტექნოლოგიების დანერგვის მნიშვნელობაზე და დამსწრეებს გააცნო ახალი პორტალის ძირითადი შესაძლებლობები და მისი პრაქტიკული დანიშნულება.
პორტალი მომხმარებლებს ეკონომიკური საქმიანობის ტექსტობრივი აღწერის საფუძველზე შესაბამისი NACE Rev.2 (სეკ 006-2016) კლასიფიკატორის კოდის სწრაფად და მარტივად მოძიების შესაძლებლობას აძლევს. ხელოვნურ ინტელექტზე დაფუძნებული სისტემა აანალიზებს მომხმარებლის მიერ მიწოდებულ ინფორმაციას და საჭიროების შემთხვევაში დამატებით დამაზუსტებელ კითხვებს სვამს, რაც ეკონომიკური საქმიანობის შესაბამისი კოდის უფრო მაღალი სიზუსტით განსაზღვრას უზრუნველყოფს.
ახალი პორტალი ხელმისაწვდომია ქართულ და ინგლისურ ენებზე და განკუთვნილია საწარმოების წარმომადგენლებისთვის, მეწარმეობის დაწყების მსურველებისთვის, საჯარო უწყებების თანამშრომლებისთვის, ფინანსური აღრიცხვის სპეციალისტებისა და ყველა იმ მომხმარებლისთვის, ვისაც საქმიანობის შესაბამისი NACE კოდის განსაზღვრა სჭირდება. AI-ჩეტბოტთან ერთად, ვებგვერდზე განთავსებულია NACE კლასიფიკატორის სრული ვერსია და ინსტრუმენტის გამოყენების მოკლე ინსტრუქცია, რაც მომხმარებლებს მიღებული შედეგის გადამოწმებისა და სისტემის ეფექტიანად გამოყენების შესაძლებლობას აძლევს.
პორტალის დანერგვა წარმოადგენს საქსტატის ციფრული ტრანსფორმაციის პროცესის მნიშვნელოვან ეტაპს და კიდევ ერთხელ ადასტურებს სამსახურის მზადყოფნას, თანამედროვე ტექნოლოგიების გამოყენებით მომხმარებლებს შესთავაზოს სწრაფი, ეფექტიანი და ინოვაციური სერვისები. აღნიშნული ინიციატივა ასევე ხელს შეუწყობს ეკონომიკური საქმიანობის კლასიფიცირების პროცესის გამარტივებას და ოფიციალური სტატისტიკის წარმოების პროცესის კიდევ უფრო ეფექტიანად განხორციელებას.
ღონისძიება კითხვა-პასუხით დასრულდა, რომლის ფარგლებშიც დამსწრეებმა ამომწურავი ინფორმაცია მიიღეს როგორც ახალი AI-პორტალის ფუნქციონირების, ისე საქსტატისა და საქართველოს ეკონომიკის განვითარების კორპორაციას შორის სამომავლო თანამშრომლობის ძირითად მიმართულებებზე.