2 დეკემბერს, სამსახურმა (SARAS) ფინანსური ანგარიშგების საერთაშორისო სტანდარტების ფონდთან (IFRS Foundation) თანამშრომლობით, ყოველწლიური ღონისძიება მეცხრედ გამართა. ღონისძიების სამიზნე აუდიტორიას წარმოადგენდნენ აუდიტორები, აუდიტორული ფირმები და იმ საწარმოთა წარმომადგენლები, რომლებიც კანონის მოთხოვნით ან ნებაყოფლობით ამზადებენ ფინანსურ ანგარიშგებებს საერთაშორისო სტანდარტების (IFRS) ან მცირე და საშუალო საწარმოების ფინანსური ანგარიშგების საერთაშორისო სტანდარტის (IFRS for SMEs) შესაბამისად.
შეხვედრის მიზანი იყო დაინტერესებული მხარეებისთვის დროული და სიღრმისეული ინფორმაციის მიწოდება ბუღალტრული აღრიცხვის სფეროში არსებულ სიახლეებსა და ცვლილებებზე, რაც ანგარიშგების ხარისხის გაუმჯობესებას უწყობს ხელს.
ღონისძიებაზე მოხსენებით წარდგა ბუღალტრული აღრიცხვის საერთაშორისო სტანდარტების საბჭოს (IASB) წევრი ბრიუს მაკენზი, და ტექნიკური გუნდის წევრი ისტონ ბილსბოროუ, რომლებმაც დეტალურად მიმოიხილეს ფასს სტანდარტებსა და მსს ფასს სტანდარტში განხორციელებული ცვლილებები და საერთაშორისო პრაქტიკაში არსებული ტენდენციები, ასევე ღონისძიების დასკვნითი ნაწილი კითხვა-პასუხის სესიას დაეთმო, რის ფარგლებშიც მონაწილეებს შესაძლებლობა ჰქონდათ უშუალოდ მომხსენებლისგან მიეღოთ პასუხები მათთვის საინტერესო საკითხებზე.
ღონისძიებამ მონაწილეებს შესაძლებლობა მისცა მიეღოთ უახლესი ინფორმაცია და პრაქტიკული რჩევები ფასს სტანდარტებისა და მსს ფასს სტანდარტის განახლებების შესახებ, რაც ხელს უწყობს ფინანსური ანგარიშგების მომზადების პროცესისა და ხარისხის გაუმჯობესებას, ასევე შესაბამისობას საერთაშორისო სტანდარტებთან.
იხილეთ ღონისძიების ფარგლებში გამოყენებული პრეზენტაცია.