მიმოხილვაში ქვეყნის საბანკო და საფინანსო სექტორებში არსებული მდგომარეობისა და მაკროეკონომიკური პარამეტრების დეტალურ ანალიზს გაეცნობით. გამოცემის მიზანია ფართო საზოგადოებას ქვეყნის მოკლევადიანი (ერთთვიანი) მაკროეკონომიკური ანალიზი ოპერატიულად მიაწოდოს. ანგარიშში წარმოდგენილი ანალიზი ამ ეტაპზე არსებულ უახლესს ინფორმაციას ეყრდნობა.
ძირითადი ტენდენციები
ინფლაცია
- ივლისში წლიურმა ინფლაციამ 5.5% შეადგინა, ხოლო ივნისთან შედარებით ფასების საერთო დონემ 0.4%-ით დაიკლო
- საბაზო ინფლაციამ, რომელიც სამომხმარებლო კალათიდან მერყევ სურსათის, ენერგომატარებლების და სიგარეტის ფასებს გამორიცხავს, ივლისში 3.5% შეადგინა
- მომსახურების ინფლაცია 4.4%-ს გაუტოლდა
საბანკო სექტორი
- ივნისში, გაცვლითი კურსის ეფექტის გამორიცხვით, სესხების ზრდის ტემპი 14.5%-ს გაუტოლდა
- დეპოზიტების დოლარიზაცია ივნისში 43.8%-მდე შემცირდა
- ივნისში მთლიანი საკრედიტო პორტფელის დოლარიზაციამ 41.6% შეადგინა
საგარეო სექტორი
- იმპორტი – საქონლის იმპორტი წლიურად 7.5%-ით გაიზარდა და 1.6 მლრდ აშშ დოლარს გაუტოლდა. ივნისში იმპორტის ზრდა ყველა დანიშნულების საქონლის ჯგუფში აღინიშნა. ზრდაში ყველაზე მნიშვნელოვანი წვლილი შუალედური მოხმარების საქონლის იმპორტმა შეიტანა, რომლის კონტრიბუციამ 5.9 პპ შეადგინა
- ექსპორტი – 20.4%-ით გაიზარდა და 770.8 მლნ აშშ დოლარი შეადგინა. ივნისში საქონლის რეგისტრირებული ექსპორტის წლიური ზრდა ძირითადად სამომხმარებლო (14.8 პპ წვლილით) საქონლის ექსპორტის ზრდამ განაპირობა. ასევე გაზრდილია შუალედური მოხმარების საქონლის ექსპორტიც (5.7 პპ წვლილით)
- ივნისის მდგომარეობით, წინა თვესთან შედარებით, ოფიციალური საერთაშორისო რეზერვები 115.8 მლნ აშშ დოლარით გაიზარდა. რეზერვების მთლიანმა მოცულობამ კი ისტორიულად მაღალ მაჩვენებელს მიაღწია და 7.1 მლრდ აშშ დოლარს გადააჭარბა
გამოცემის ნახვა შესაძლებელია ეროვნული ბანკის ოფიციალურ ვებგვერდზე “პუბლიკაციების” რუბრიკაში.