საქართველოს ფინანსთა სამინისტროს მმართველობის სფეროში შემავალი საჯარო სამართლის იურიდიული პირი – შემოსავლების სამსახური გაცნობებთ, რომ 2026 წლის 20 ნოემბრიდან ამოქმედდება „საჯარო სამართლის იურიდიული პირის − შემოსავლების სამსახურის მიერ მომსახურების გაწევისათვის საფასურებისა და მათი განაკვეთების დამტკიცების შესახებ“ საქართველოს მთავრობის 2010 წლის 30 მარტის №96 დადგენილებაში შეტანილი ცვლილება.
ცვლილების მიხედვით, განსხვავებული მომსახურების საფასური (1 ტონაზე 40 ლარი) დაწესდა სეს ესნ-ის 2523 სასაქონლო პოზიციაში კლასიფიცირებული ცემენტის თავისუფალ მიმოქცევაში გაშვების პროცედურაში გაფორმების მომსახურების გაწევაზე.
აღნიშნული მომსახურების საფასური არ ვრცელდება, თუ საქონლის დეკლარირებისას წარდგენილია წარმოშობის სერტიფიკატი EUR.1 ან წარმოშობის დეკლარაცია, გაცემული ერთ-ერთი შემდეგი ხელშეკრულების შესაბამისად:
- „ერთი მხრივ, საქართველოსა და, მეორე მხრივ, ევროკავშირს და ევროპის ატომური ენერგიის გაერთიანებას და მათ წევრ სახელმწიფოებს შორის“ 2014 წლის 27 ივნისის ასოცირების შესახებ შეთანხმება;
- „ევროპის თავისუფალი ვაჭრობის ასოციაციის ქვეყნებსა და საქართველოს შორის თავისუფალი ვაჭრობის შესახებ“ 2016 წლის 27 ივნისის შეთანხმება;
- „საქართველოსა და დიდი ბრიტანეთისა და ჩრდილოეთ ირლანდიის გაერთიანებულ სამეფოს შორის სტრატეგიული პარტნიორობისა და თანამშრომლობის“ 2019 წლის 21 ოქტომბრის შეთანხმება.
მომსახურების საფასურის მოქმედების ვადად განსაზღვრულ იქნა 2026 წლის 20 ნოემბრიდან და 2027 წლის 20 მაისამდე პერიოდი.
საქართველოს მთავრობის დადგენილება შეგიძლიათ იხილოთ შემოსავლების სამსახურის საინფორმაციო და მეთოდოლოგიური ჰაბის ბმულზე

