ანგარიშვალდებული პირების ინფორმირების მიზნით, სამსახურმა (SARAS) ML/TF რისკის ზედამხედველობის ანგარიშგების შევსებისა და წარდგენის წესებთან დაკავშირებით, ონლაინ ფორმატში, საინფორმაციო შეხვედრები გამართა.
შეხვედრების ფარგლებში სამსახურის წარმომადგენლებმა დეტალურად ისაუბრეს „ფულის გათეთრებისა და ტერორიზმის დაფინანსების აღკვეთის ხელშეწყობის შესახებ“ საქართველოს კანონით გათვალისწინებულ ვალდებულებებზე და განმარტეს ML/TF რისკის ზედამხედველობის ანგარიშგების შევსებისა და წარდგენის პროცედურები და ვადები. ღონისძიების დასკვნითი ნაწილი კითხვა-პასუხის სესიას დაეთმო, რის ფარგლებშიც მონაწილეებს შესაძლებლობა ჰქონდათ უშუალოდ მომხსენებლებისგან მიეღოთ პასუხები მათთვის საინტერესო საკითხებზე.
„ფულის გათეთრებისა და ტერორიზმის დაფინანსების აღკვეთის ხელშეწყობის შესახებ“ საქართველოს კანონის მიზნებისთვის, სამსახურის მიმართ ყველა ანგარიშვალდებულ პირს ევალება ML/TF რისკის ზედამხედველობის ანგარიშგება წარუდგინოს სამსახურს (SARAS) არაუგვიანეს 2026 წლის 31 იანვრისა. ანგარიშგება მოიცავს 2025 წლის 1 მარტიდან 31 დეკემბრის ჩათვლით საანგარიშგებო პერიოდს, რომლის შევსება ხდება ანგარიშვალდებული პირის საკუთარი რეესტრის გვერდიდან, ML/TF ანგარიშგების ფორმების ჩანართის მეშვეობით.
ანგარიშვალდებული პირები არიან: სერტიფიცირებული ბუღალტერები, პროფესიული მომსახურების გამწევი ბუღალტერები და აუდიტორები, რომლებიც დამოუკიდებლად ახორციელებენ პროფესიულ საქმიანობას, ასევე საბუღალტრო და აუდიტორული ფირმები.
ანგარიშგების შევსებისა და წარდგენის წესი დამტკიცებულია სამსახურის უფროსის 2024 წლის 9 დეკემბრის N ნ-16 ბრძანებით – „ანგარიშვალდებული პირის ფულის გათეთრებისა და ტერორიზმის დაფინანსების რისკის ზედამხედველობის ანგარიშგების ფორმების შევსებისა და წარდგენის წესი“.
გთხოვთ, გაითვალისწინოთ, რომ ML/TF რისკის ზედამხედველობის ანგარიშგების წარუდგენლობა, არასრულად ან დაგვიანებით წარდგენა წარმოადგე.ნს „ბუღალტრული აღრიცხვის, ანგარიშგებისა და აუდიტის შესახებ“ საქართველოს კანონით გათვალისწინებული პასუხისმგებლობის საფუძველს.
იხილეთ ML/TF რისკის ზედამხედველობის ანგარიშგების შევსებისა და გაგზავნის შესახებ ვიდეო ინსტრუქცია