კითხვა: 2019 წლიდან ჩვენს შპს-ში წილებს ფლობდნენ ბიძა (55%) და მისი ძმისშვილი (45%). 2025 წლის ივნისში წილის უსასყიდლოდ დათმობის ხელშეკრულებით, ბიძის კუთვნილი წილი სრულად გადაფორმდა სხვა ძმისშვილზე. წილის უსასყიდლოდ დათმობა დასაბეგრი ოპერაცია ხომ არ არის ფირმისთვის?
პასუხი: შპს-ის პარტნიორებს შორის მომხდარი წილების ყიდვა-გაყიდვის ოპერაციები (როდესაც ისინი გარიგებაში შედიან უშუალოდ ერთმანეთთან და არა შპს-ის „გავლით“ ანუ მისი თანხების გამოყენებით) საერთოდ არ წარმოადგენს შპს-ის ოპერაციას. ის არ აისახება ფირმის ბუღალტერიაში.
ფიზიკური პირის მიერ წილის გასხვისება (გაყიდვა, გაჩუქება) დღგ-ით არ იბეგრება და არც საშემოსავლო გადასახადით დაიბეგრება, რადგან ამ წილს მისი მესაკუთრე 2 წელზე მეტი ვადით ფლობდა. რაც შეეხება წილის მიმღები ფიზიკური პირის შესაძლო დაბეგვრას, აღნიშნული ოპერაცია არც მისთვის არის დასაბეგრი, რადგან ეს 55% წილი ბიძამ აჩუქა ძმისშვილს, რომელიც არის მისი II რიგის მემკვიდრე, სსკ 82-ე მუხლის 1-ლი ნაწილის „ზ“ პუნქტის თანახმად კი: „1. საშემოსავლო გადასახადით დაბეგვრისაგან თავისუფლდება ფიზიკურ პირთა შემოსავლების შემდეგი სახეები:…
ზ) საგადასახადო წლის განმავლობაში I და II რიგის მემკვიდრეების მიერ ჩუქებით ან მემკვიდრეობით მიღებული ქონების ღირებულება“.
ამავე მუხლის მე-4 ნაწილის „გ.ბ“ პუნქტის მიხედვით:
„გ) ქონების ჩუქებისას ან/და ანდერძით მემკვიდრეობისას I, II, III და IV რიგის მემკვიდრეებად ითვლებიან შემდეგი პირები:…
გ.ბ) II რიგის მემკვიდრეებად _ და, ძმა, დისწული, ძმისწული და მათი შვილები“.