23 იანვრის მონაცემებით, ძვირფასი ლითონების ბაზარზე ფასების მკვეთრი ზრდის ტენდენცია კვლავ გრძელდება. ოქროს ღირებულება ბოლო ერთ თვეში დამატებით 10%-ით გაიზარდა და უნციამ (1 უნცია = 31.01გრ) 4,970 დოლარს მიაღწია, რაც რეკორდული მაჩვენებელია და ისტორიულ შედეგს წარმოადგენს. საერთო ჯამში, ბოლო ერთ წელიწადში ოქრო 78%-ით გაძვირდა, ხოლო მხოლოდ ბოლო ერთ კვირაში მატებამ 7.5%-ს მიაღწია.
ექსპერტები აღნიშნავენ, რომ ოქროს ასეთი მკვეთრი გაძვირება გამოწვეულია გეოპოლიტიკური დაძაბულობით, სავაჭრო ომების შიშით და ინვესტორების „უსაფრთხო თავშესაფრის“ აქტივებზე გადართვით. ძვირფასი ლითონების გაძვირებაზე განსაკუთრებით დიდი გავლენა იქონია აშშ-ის მიერ გრენლანდიასთან დაკავშირებული ტარიფების საფრთხემ და გლობალური ფინანსური სისტემის მდგრადობის მიმართ არსებული ეჭვებმა.
გრენლანდიის ტარიფების კრიზისი. აშშ-ის ადმინისტრაციის მხრიდან ტარიფების დაწესების საფრთხემ გამოიწვია ახალი სავაჭრო ომის შიში. ინვესტორებმა „უსაფრთხო აქტივებისკენ“ გადაინაცვლეს, რამაც ოქროს ფასის მკვეთრი ზრდა გამოიწვია.
გლობალური სავაჭრო დაძაბულობა. ტარიფების გარდა, ინვესტორები შიშობენ ახალი ეკონომიკური დაპირისპირებების გამო, რაც ზრდის მოთხოვნას „უსაფრთხო თავშესაფრის“ აქტივებზე, მათ შორის ოქროზე.
ფასის ისტორიული ზრდის გაგრძელება. 2025 წელს ოქროს ფასი 70%-ზე მეტით გაიზარდა. 2026 წლის დასაწყისში ეს ტენდენცია გაგრძელდა და 23 იანვარს სპოტ-ფასი, ანუ მომენტალური სარეალიზაციო ღირებულება $4,970-მდე ავიდა, რაც აბსოლუტური რეკორდია.
ოქროს გაძვირების კიდევ ერთი მნიშვნელოვანი ფაქტორია, რომ ინვესტორები აღარ ცდილობენ კაპიტალის მხოლოდ კონკრეტულ მოვლენებზე დაზღვევას (მაგ. არჩევნებზე), არამედ უფრო ფართო და ხანგრძლივ რისკებზე კონცენტრირდებიან და მათთვის მნიშვნელოვანი ფაქტორებია საბიუჯეტო პოლიტიკის მდგრადობა, გლობალური ფინანსური სტაბილურობა.
შექმნილ ვითარებაში ანალიტიკოსები პროგნოზირებენ, რომ 2026 წლის მეორე კვარტალში ოქროს ღირებულებამ შესაძლოა $5,000-ს გადააჭარბოს.
