კითხვა: ჩვენმა კომპანიამ ვებგვერდის შექმნისთვის რუსულ კომპანიას გადაუხადა რუბლები. კონტრაქტი არ გვაქვს, საიტი დამზადებულია რაღაც საქონლის გაყიდვებისთვის.
ეს გადახდა არარეზიდენტის დღგ-ით და საშემოსავლო გადასახადით გადახდის წყაროსთან უნდა დავბეგროთ?
პასუხი: საქართველოს კომპანიის ინდივიდუალური დაკვეთით ვებგვერდის დამზადება რუსული კომპანიის მიერ (რომელსაც არ აქვს ფიქსირებული დაწესებულება საქართველოში) დღგ-ით დაბეგვრის მიზნებისათვის წარმოადგენს საქართველოში გაწეულ მომსახურებას, სსკ 162(1) მუხლის მე-3 ნაწილის „ა“ პუნქტის მიხედვით. აღნიშნულიდან გამომდინარე, ის უნდა დაიბეგროს სამუშაოს დასრულების თვეში (ან უფრო ადრე, თუ არარეზიდენტი კომპანიისთვის თანხები გადახდილია ავანსის სახით) უკუდაბეგვრის დღგ-ით, სსკ 161-ე მუხლის 1-ლი ნაწილის „ა“ პუნქტის შესაბამისად.
არარეზიდენტის საშემოსავლო გადასახადით დაბეგვრის საკითხის გადასაწყვეტად, უნდა შევაფასოთ, რა სახის გადახდასთან გვაქვს საქმე. როგორც დასმული კითხვიდან შეგვიძლია ვივარაუდოთ, რუსულმა კომპანიამ საქართველოს კომპანიის დაკვეთით დაამზადა კონკრეტული პროგრამული უზრუნველყოფა (ვებგვერდი), ანუ შეასრულა დამკვეთის დავალება, რის შედეგადაც შეიქმმა ამ დამკვეთის კუთვნილი პროდუქტი. ასეთ შემთხვევაში, ეს შემოსავალი საგადასახადო მიზნით არ აკმაყოფილებს როიალტის განმარტებას (აქ შევნიშნავთ, რომ როიალტი მუდამ არის ცალკე თავად განმარტებული „ორმაგი დაბეგვრის თავიდან აცილების შესახებ“ საერთაშორისო შეთანხმებებში, რომლებიც უფრო მაღლა მდგომი დოკუმენტებია, ვიდრე საქართველოს საგადასახადო კოდექსი, მაგრამ საქართველოსა და რუსეთის ფედერაციას შორის წლების წინ გაფორმებული ასეთი ხელშეკრულება არ არის სამართლებრივად მოქმედი ანუ ძალაში შესული), რომელიც მოცემულია სსკ მე-8 მუხლის „ბ“ პუნქტში. ამიტომ ამ მომსახურებისთვის გადახდილი საზღაური არ ჩაითვლება საქართველოში არსებული წყაროდან მიღებულ შემოსავლად და არ დაიბეგრება გადახდის წყაროსთან არარეზიდენტის საშემოსავლო გადასახადით (მიუხედავად იმისა, რომ საზღაურს იხდის საქართველოს რეზიდენტი კომპანია). ეს გამომდინარეობს იქიდან, რომ ამ მომსახურებას არ ესადაგება არც სსკ 104-ე მუხლის 1-ლი ნაწილის „გ.თ“ პუნქტი: „მომსახურების გამწევი და მომსახურების მიმღები სხვადასხვა სახელმწიფოში არიან და მომსახურების გამწევის მიერ მომსახურების გაწევა ხორციელდება საქართველოში მისი მუდმივი დაწესებულების, დაქირავებულის მეშვეობით ან სხვაგვარად (მათ შორის, მომსახურების გამწევის მიერ მომსახურების გაწევასთან დაკავშირებული ხარჯი გაწეულია საქართველოში, მიუხედავად მისი ფაქტობრივად გადახდის ადგილისა), რაც ადასტურებს, რომ მომსახურების გამწევმა საქართველოში გასწია მომსახურება“, და არც ამ მუხლის რომელიმე სხვა პუნქტი.