მიუხედავად იმისა, რომ ირანის ირგვლივ მიმდინარე საომარი მოქმედებების გამო ნავთობზე მსოფლიო ფასები პიკზეა, ენერგოგიგანტი Exxon Mobil-ი პირველ კვარტალში მოგების საგრძნობ კლებას პროგნოზირებს. კომპანიის ოფიციალური მონაცემებით, მოსალოდნელი მოგება 5 მილიარდ დოლარამდე შემცირდება, რაც წინა კვარტალთან შედარებით 30%-იანი ვარდნაა.
მოგების შემცირებას რამდენიმე მიზეზი აქვს:
მთავარი მიზეზი ფინანსური დერივატივები და ჰეჯირების კონტრაქტებია. კომპანიამ ფასების დაზღვევისას ვერ გათვალა კონფლიქტის ასეთი მასშტაბი, რამაც მრავალმილიარდიანი ბუღალტრული ზარალი გამოიწვია.
Exxon-ის გლობალური მოპოვების მეხუთედი (20%) კატარსა და საამიროებზე მოდის. ჰორმუზის სრუტის არასტაბილურობამ – ხან გახსნამ და ხან ჩაკეტვამ ეს რესურსი ფაქტობრივად გამოამწყვდია, რის გამოც მოპოვება 6%-ით შემცირდა.
საწვავის გადამუშავების სექტორში ზარალი 5,3 მლრდ დოლარს აღწევს. ეს გამოწვეულია იმით, რომ ტვირთები გზაშია გაჩერებული და მათი რეალიზაცია ვერ ხერხდება. ბუღალტრული წესებით, მოგება მხოლოდ მაშინ აღირიცხება, როცა ტანკერი დანიშნულების ადგილზე მივა.
ბოლო მდგომარეობით, განმუხტვისკენ წასული სიტუაცია ისევ დაძაბულობის რეჟიმში გადავიდა. თეთრი სახლისა და თეირანის მუქარების ფონზე, ბაზრებზე გაურკვევლობა იმატებს. თუმცა, Exxon-ის ფინანსური დირექტორი ოპტიმიზმს ინარჩუნებს და აცხადებს, რომ ეს ზარალი „დროებითი და ტექნიკურია“. როგორც კი სრუტეში ნაოსნობა აღდგება, დაგროვილი პროდუქციის გაყიდვა კომპანიას მომდევნო კვარტალში რეკორდულ მოგებას მოუტანს.
ამჟამად ინვესტორები ფრთხილობენ, რადგან Exxon-ის მაჩვენებლები მკაფიო სიგნალია იმისა, რომ ომის დროს მაღალი ფასი ყოველთვის მაღალ მოგებას არ ნიშნავს.