ჩინური ავტომობილების ექსპორტმა მსოფლიოში რეკორდულ ნიშნულს მიაღწია. ჩინეთის ავტომობილების მწარმოებელთა ასოციაციის (China Association of Automobile Manufacturers – CAAM) მონაცემებით, გასულ თვეში საზღვარგარეთ 748 000 ავტომობილი გაიყიდა, რაც წინა წელთან შედარებით 82,4%-ით მეტია. განსაკუთრებით გაიზარდა ელექტრო და ჰიბრიდული მანქანების ექსპორტი 140%-ით, 363 000 ერთეულამდე.
BYD და Geely Auto აქტიურად ავითარებენ ექსპანსიას ევროპაში, ლათინურ ამერიკასა და სამხრეთ-აღმოსავლეთ აზიაში. ეს ტენდენცია კიდევ უფრო გაძლიერდა მას შემდეგ, რაც ჩინეთში მსუბუქი ავტომობილების გაყიდვები მარტში 19,2%-ით შემცირდა. მოთხოვნის კლებას ხელი შეუწყო სახელმწიფო სუბსიდიების შემცირებამ, უძრავი ქონების კრიზისმა და მწარმოებლებს შორის გამწვავებულმა საფასო ომმა.
ანალიტიკოსების შეფასებით, საწვავის გაძვირება – განსაკუთრებით ირანის ირგვლივ მიმდინარე კონფლიქტის გამო მომხმარებლებს ელექტრომობილებზე გადასვლისკენ უბიძგებს. ამ მიმართულებით ჩინეთი ლიდერობს და არსებული გეოპოლიტიკური ვითარებით ეფექტურად სარგებლობს.
ჩინური კომპანიები ცდილობენ დაასწრონ ევროკავშირის მიერ დაანონსებულ ახალ ტარიფებს, რომლებიც შესაძლოა მალე დაწესდეს ჩინურ ელექტრომობილებზე. სწორედ ამიტომ პორტებში გადაზიდვის ტემპი მაქსიმალურად დაჩქარდა, მიუხედავად იმისა, რომ ჰორმუზის სრუტის კრიზისმა ლოგისტიკური ხარჯები გაზარდა.
მსოფლიო მასშტაბის წამყვანი საინვესტიციო ბანკების თუ საკონსულტაციო კომპანიების ექსპერტების პროგნოზით, ჩინური ავტომწარმოებლების გლობალური გაყიდვები წელს მინიმუმ 20%-ით გაიზრდება, რაც ქვეყანას მსოფლიოს წამყვან ავტოექსპორტიორად დაამკვიდრებს.