კითხვა: კომპანია, რომელიც იყიდის კომერციულ ფართს ჩემგან ანუ დღგ-ის გადამხდელი არამეწარმე ფიზიკური პირისგან (მას შემდეგ რაც დავრეგისტრირდები გადამხდელად), ამ ფართის შესყიდვიდან დღგ-ს ჩაითვლის? თუ კი, რა იქნება ამისთვის საჭირო?
პასუხი: იმისათვის, რომ ახლად რეგისტრირებულმა დღგ-ის გადამხდელმა პირმა საგადასახადო ანგარიშ-ფაქტურა გამოწეროს, აუცილებელია მას ჰქონდეს კვალიფიციური დღგ-ის გადამხდელი პირის სტატუსი. როგორც წესი, დასაწყისში მას ეძლევა არაკვალიფიციური დღგ-ის გადამხდელი პირის სტატუსი, ხოლო შემდეგ, როდესაც მას გაუჩნდება დღგ-ით დასაბეგრი ოპერაციები, მიანიჭებენ კვალიფიციური დღგ-ის გადამხდელი პირის სტატუსს. ეს საკითხი მიმოხილულია შემოსავლების სამსახურის უფროსის 2022 წლის 16 თებერვლის №3751 ბრძანებაში „ცალკეულ შემთხვევებში გადასახადის გადამხდელისათვის საგადასახადო ანგარიშ-ფაქტურის, საგადასახადო დოკუმენტის გამოწერის/დადასტურების და სასაქონლო ზედნადების გამოწერის უფლების შეზღუდვის და გადასახადის გადამხდელის მიერ გამოწერილი ელექტრონული საგადასახადო ანგარიშ-ფაქტურის გამოყენების სპეციალური წესის განსაზღვრის შესახებ“ ინსტრუქციის დამტკიცების თაობაზე“.
ზემოაღნიშნულის გარდა, კომპანიის მიერ დღგ-ის ჩათვლა არ არის დამოკიდებული იმაზე, თუ ვინ იყო მისთვის საქონლის/მომსახურების მიმწოდებელი. მთავარია, რომ თავად ეს კომპანია იყოს დღგ-ის გადამხდელი და საქონლის/მომსახურების შეძენაზე ჰქონდეს ჩათვლის დოკუმენტი – ამ შემთხვევაში, საგადასახადო ანგარიშ-ფაქტურა, რომელიც ექნება კიდევაც.
როცა ეს პირობები დაკმაყოფილებულია, მაშინ კომპანიას წარმოეშვება დღგ-ის ჩათვლის უფლება იმ შემთხვევაში, თუ შეძენილი კომერციული ფართი მის მიერ გამოყენებული იქნება დღგ-ით დასაბეგრ ოპერაციებში, ან დღგ-ის ჩათვლის უფლებით გათავისუფლებულ ოპერაციებში, ხოლო თუ გამოყენებული იქნება დღგ-ის ჩათვლის უფლების გარეშე გათავისუფლებულ ოპერაციებში, მაშინ დღგ-ს ვერ ჩაითვლის. იმ შემთხვევაში, თუ შეძენილი კომერციული ფართი კომპანიის მიერ გამოყენებული იქნება როგორც ისეთ ოპერაციებში, რომლებიც იძლევიან ჩათვლის უფლებას, ასევე ისეთ ოპერაციებში, რომლებიც დღგ-ის ჩათვლის უფლებას არ იძლევიან, გამოყენებული უნდა იქნეს დღგ-ის ჩათვლის პროპორციული წესი სსკ 177-ე მუხლის შესაბამისად.