კითხვა: დღგ-ისგან გათავისუფლებულია იმპორტი (სამედიცინო დანიშნულების სადიაგნოსტიკო ტესტ-სისტემები, გლუკომეტრები), რომელიც არის არასამედიცინო ორგანიზაციის მიერ იმპორტირებული. მისი შემდგომი მიწოდება: ა) ფიზიკურ პირებზე; ბ) აფთიაქებზე; გ) სამედიცინო კლინიკებზე, იბეგრება თუ არა დღგ-ით?

პასუხი: სამედიცინო დანიშნულების სადიაგნოსტიკო ტესტ-სისტემებისა და გლუკომეტრების იმპორტი გათავისუფლებულია დღგ-ისგან სსკ 173-ე მუხლის „საქონლის იმპორტის დღგ-ისგან გათავისუფლება“ „გ“ პუნქტის მიხედვით:
დღგ-ისგან გათავისუფლებულია: „გ) საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს მიერ რეგისტრირებული სეს ესნ-ის 2844 კოდით გათვალისწინებული რადიოფარმპრეპარატების, სეს ესნ-ის 8419 20 000 00, 9001 30 000 00, 9001 40 და 9001 50 კოდებით, სეს ესნ-ის 9018–9022 კოდებით (გარდა 9022 29 000 00 კოდისა), 9025 11 200 00 და 9402 90 000 00 კოდებით გათვალისწინებული საქონლის, სეს ესნ-ის 8713 და 8714 20 000 00 კოდებით გათვალისწინებული ეტლებისა და მათი ნაწილების და საკუთნოების, სამედიცინო დანიშნულების რენტგენის ფირების, სამედიცინო დანიშნულების სადიაგნოსტიკო ტესტ-სისტემების, გლუკომეტრების (რომელთა ტესტ-სისტემები საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს მიერაა რეგისტრირებული) იმპორტი“.
მათი შემდგომი მიწოდება ასევე გათავისუფლებულია დღგ-ისგან, რადგან სსკ 171-ე მუხლის 1-ლი ნაწილის „ღ“ პუნქტის თანახმად განსაზღვრულია:
„1. დღგ-ისგან ჩათვლის უფლების გარეშე გათავისუფლებულია:…
ღ) ამ კოდექსის 173-ე მუხლის „ა“–„ო“ ქვეპუნქტებით გათვალისწინებული საქონლის მიწოდება“.