კითხვა: თუ ქართული კომპანია სესხს იღებს უცხოური არასაბანკო კომპანიისაგან, ვალდებულია თუ არა ამ სესხის მისაღებად (სესხის ოდენობა დიდია) აიღოს ნებართვა ან საქართველოს ეროვნული ბანკისგან, ან იუსტიციის სამინისტროსაგან, ან რომელიმე სხვა დაწესებულებისაგან? მაგალითად, ტაჯიკეთში, ასეთი ნებართვა მოითხოვება.
პასუხი: არც საქართველოს სამოქალაქო და არც საბანკო კანონმდებლობით, ასეთი ნებართვა არ მოითხოვება. საქართველოს სამოქალაქო კოდექსის მიერ დაწესებულია მხოლოდ რამდენიმე სახის შეზღუდვა სესხებზე, რომლებიც განსაზღვრულია 625-ე მუხლით, მათ შორის, მისი მე-7 ნაწილით:
„7. თუ საქართველოს კანონმდებლობით სხვა რამ არ არის დადგენილი, 200 000 (ორასი ათას) ლარამდე სესხი უნდა გაიცეს მხოლოდ ლარით, გარდა იმ შემთხვევისა, როდესაც სესხის გაცემის შედეგად მსესხებლის ჯამური ვალდებულებები ამავე გამსესხებლის მიმართ 200 000 (ორასი ათას) ლარს აღემატება. ამ ნაწილის მიზნებისათვის ლარით გაცემულ სესხად არ მიიჩნევა ნებისმიერი ფორმით უცხოურ ვალუტაზე მიბმული ან ინდექსირებული სესხი“.
ასევე, უნდა აღინიშნოს, რომ იმ ქართულ ბანკს, სადაც თანხა უნდა ჩაირიცხოს, შეიძლება თავისი შიდა რეგულაციებით დაწესებული ჰქონდეს დამატებითი დოკუმენტაციის მოთხოვნები ამ სესხთან დაკავშირებით (მაგალითად, მოითხოვოს სესხის წერილობითი ხელშეკრულება).