კითხვა: ღვინის მწარმოებელმა კომპანიამ ბანკისგან აიღო სესხი და ააშენა სასტუმრო. დასაწყისში (რამდენიმე თვე) ღვინის წარმოება და სასტუმრო ფუნქციონირებდა ერთი შპს-ის სახელით.
სასტუმროს შენობის ექსპლუატაციაში მიღების შემდეგ დაფუძნდა ახალი შპს, რომლის კაპიტალშიც შევიდა სასტუმროს შენობა.
გვინდა სასტუმროს ასაშენებლად აღებული ბანკის სესხი გადავიტანოთ ახალ შპს-ზე (სასტუმროს მმართველ შპს-ზე). როგორი ფორმით შეიძლება ამ ტრანზაქციის განხორციელება, რას გვირჩევთ?
პასუხი: ღვინის მწარმოებელი კომპანიის მიერ აშენებული, საბანკო სესხით დაფინანსებული სასტუმროს შეტანა ახალდაფუძნებული შპს-ის კაპიტალში სრულიად გასაგები ტრანზაქციაა, მაგრამ ეს, ცხადია, ავტომატურად არ ცვლის საბანკო სესხის ხელშეკრულების პირობებს. იმისათვის, რომ საბანკო სესხი გადაფორმდეს ახალდაფუძნებულ შპს-ზე, ამისათვის აუცილებელია ბანკის თანხმობა და სესხის ხელშეკრულებაში თანხის მსესხებლის (ღვინის კომპანიის) ჩანაცვლება ახალი შპს-ით. თუმცა, არ ვართ დარწმუნებული, რომ ბანკი ამ თანხმობას გასცემს, რადგან შეიძლება მან მიიჩნიოს, რომ ამ შემთხვევაში გაუარესდება სესხის სრულად და დროულად დაფარვის ალბათობა.
ბანკის უარის შემთხვევაში, ჩვენთვის ძნელი სათქმელია, თუ რა შეიძლება იყოს ოპტიმალური ქმედება ღვინის კომპანიისთვის, რათა საბანკო სესხის ხარჯები ახალ (სასტუმროს მმართველ) შპს-ს დააკისროს. მაგალითად, ერთ-ერთი შესაძლო ქმედება შეიძლება იყოს ახალი შპს-დან მოგების რეგულარული გატანა დივიდენდების სახით, მაგრამ საამისოდ, ამ ახალ შპს-ს სათანადო ოდენობით მოგება უნდა ჰქონდეს.